33 Jaor bühn plezeer bekroeëndj
33 Jaor bühn plezeer bekroeëndj met finaleplaats vör Rob Princen beej ‘t Groeët Limburgs Buuttekampioenschap 2026.
‘t Wurdtj ’n bi-jzeûndjer sezoên vör emes dae al 33 jaor lânk met plezeer oppe bühn stieët. ‘n Sezoên woeë in alles same liektj te kome. Want nao zes deilnames aanne veurrondes, es ‘t beej de zevendje kieër eindelik raak: dé finale van ‘t Limburgs Buuttekampioenschap és bereiktj! En asof dét nog neet genog es, breengtj hae ziêne buut ouch oppe Boonte Aovendje beej de Vêrkusköp. Uutgeraekendj in dit jubileumjaor keumtj vör Rob alles same.
Van herte prefisjat finalist! Waat dacht djae toen dejje eûre naam huuërdje beej de bekindjmaking?
‘’Mien reactie waas: Jao, eindelik!!! Nao zes ieërdere poginge zit ich d’r beej en moog ich nao de finale! En ieërlik es ieërlik, in ‘t begin veultj ‘t as ‘n stökske ongeluîf, mien hang trildje nog wat nao en det zât zich um nao bli-jschap en hieël gruuëts tegeliêk.Gae staotj met “De stuntelendje stuntman” inne finale. Wi-j zeejjae op ‘t idee gekome?
Waat ich beej de buut veurâl gaer doon, es met ‘n typetje of thema kome det nog noeëts ieërder gedoon es doeër emes. Ze zegge altiêd: ‘’Alles es al ‘n kieër gebrachtj inne buut’’.
Kloptj êrges, mer vör mich ‘n extra uutdaging en driêfveer um toch te zeuke en te keeze vör iets det écht nog noeëts ieëder gebrachtj es. Dan zeejje toch ‘n bitje ‘n waaghals, en toen dacht ich, ‘n stuntman! Dét zeen ouch waaghâlze. Zoeë es ‘t idee begonne.
Es eûr buut noow klaor, of gooje ‘m nog finetune?
‘n Buut es eigelik noeëts klaor. Gae blieftj altiêd schave aanne tekst of d’r ontstaon spontaan dînger beej optreî-jjes, of d’r scheete weer wat leuke dînger te binne di-j ich d’r toch weer in wîl prebieëre te verwêrke. Finetune en aanvulle blief ich dus eigelik altiêd waal doon.
Inne vuuërronde stóngdje heej in Wieërt in ‘t Munttheater, wi-j speciaal veultj ‘t um in eur eîge stad de buut te moge breenge?
Dét es gewêldjig! Of zoeë as vae det heej in Wieërt zegge: ‘’Dao bin ich hieël êrg gruuëts op’’
Daonaeve es ‘t Munttheater vör mich ‘n bekindj en vertrawdje bühn. Dao es ‘t namelik allemaol oeëts vör mich begonne as zesjaorig jöngske beej de Wichter Boonte Middig.
Noow heb ich dao in totaal dri-j kieër moge staon met ‘n buut inne vuuërronde.
Dit jaor brîngdjae eûre buut ouch oppe Boonte Aovendje. Veultj det noow extra speciaal?
Ondanks det ich ongevieër um ‘t jaor de buut moog doon goon ich waal jao zegge. ‘t Es namelik 6×11 V.V. De Vêrkusköp, ich stoon zelf 3×11 jaor oppe plênk, en speul zelf ouch al jaore mej in sketches. Dus jao, det veultj zeker speciaal. Dus vae goon knalle!
33 jaor oppe bühn, waat waas ‘t schoeënste, en waat gieët d’r nog kome?
‘t Klînktj misschien cliché, mer eigelik zeen d’r zoeëvöl schoeën memênte geweisj qua sketches, medespeulers, regisseurs, te völ um op te neume. Ich bin edereîn woeëmej ich same op of achter de bühn heb gestaon dankbaar vör al dieës schoeën memênte.
Waat d’r nog kome gieët? Gein idee, mer ich kiek d’r met hieël völ plezeer nao uut! Eîn deenk es in eder geval zeker, ich bin nog lang neet uutgefieësj!
Tot slot – ‘n Jaor um in te liêste
Tot slot nog efkes oeëver de finale van ‘t buuttekampioenschap, wannieër es dit en waat verwachdje d’rvan tiêdes de finale?
De finale es op vriêdag 9 jannewari in TheaterHotel De Oranjerie. As d’r minse wille kome kieke dan zooj ich det hieël êrg gaaf veenge! Kiek vör kaertjes efkes oppe website van ‘t LVKA (www.lvka1.nl) dao stieët mieër informatie. Mer kom ouch zeker nao de Boonte Aovendje kieke!
Waat verwacht ich vör de finale? Hieël völ plezeer! Ich goon dao enorm van geniete! ‘t Hale vanne finale es ‘n oeëverwinning en ‘n doel det bereiktj es, de rest waat d’r allemaol extra beej keumtj es vör mich ‘ne bonus. Ich kiek d’r in eder geval nao uut um lekker te goon stunte!
‘t Es ‘n sezoên det vör Rob veultj as ‘n cadeautje: ‘n finaleplek, de buut breenge op Boonte Aovendje en ‘n jubileum van 33 jaor oppe plênk. ‘n Jaor det bewiesj det doeërzette loêntj, det leefdje vör ‘t vak noeëts slietj en det ‘ne stuntelendje stuntman soms precies wetj woeë hae nao tôw mot.
En noow? Noow es ‘t aaftelle nao ‘t groeëte memênt — met ‘n glimlach, ‘n snufje gezonde spanning en veurâl hieël völ plezeer.
