Preens Frank I, de nôwe preens van V.V. de Vêrkusköp
Hé hé eindelik moog en kin ich ut eederein vertelle,ich bin de nôwe preens van V.V. de Vêrkusköp.
Ich bin Frank Stijnen en bin unne zoeën van Frenske van Spijk van Thieu en Maria van keffee zaal Stijnen op Bosseve, ouch waal bekindj as Frenske de Stukadoor.
Os mam es Lies Kissen van To en Gradje Kissen van de maelhandel uut de Buulderbos. Ich heb altieëd op Fatima gewoeëntj totdet ich saame met mien vrâw Linda un hoeës kocht oppe Kokmieeuw oppe Graasweenkel. Vanaâf dae tieed zeen vae verzotj op Wieërt Zuid.
Mien vraw Linda es un dochter van Henny vanne Poort en van Gerrie van Henk Verhees van ‘t oaj st. Joeezef gebauw. Ich deenk det de meiste minse Linda waal kinne, want Linda werruktj doeër de waek als kapster beej Kapsalon Wigbert oppe Maasport.
Vae hebbe saame ein dochter met de naam Veerle. Zeuj es 10 jaor aod en ouch komplieet verzotj op vastelaovundj.
Ich verdeen mieëne boeterham beej Dorel. Vôr de meiste mînse baeter bekindj as Maxi Cosi autosteulkes en Quinny wichterwaages. Dao bin ich Repair Engineer. Ich mot d’r vör zurrige det vae deej dinger ouch allemaol motte kinne rippariere mochte ze kapot gaon.
As ich thoeés kom, en heb noch waat tieéd oeever, dan besteej ich dae gaer aan ‘n aantal hobbies. De ieërste es neturlik Vastelaovundj veere. As det de vastelaovundjklei-jer weer inne kast gehange waere, dan begintj ‘t beej mich te kriebelle en wil ich gaer de weeg op met miene racefiets.
Det heb ich 25 jaor as fanatiek wedstrijdrenner gedaon mer now doon ich det waat rustiger aan beej de wielerclub in Rooj, met ‘n paar aod renners uut Wieërt en umstreeke.
Vanaâf îndj september beginne mien creatieve handjes te kriebeke en duike vae met ‘n aantal man en vrölli-j de loeëds in um te bawe aan de dekors vôr de Boonte Aovundje inne Stad.
En vôr dej-jae ‘t wetj esj weer Vastelaovundj en bin ich ‘n jaorke aojer.
Dit sezoen gaon ich neet allein met mien vrâw en dochter op paad mer ouch met mien sjiek gevolg. Mien gevolg bestieët ten ieërste uut Kris Vankerkom. Hae is nôw neet allein mieën schoeënbroor mer auch miene adjudânt. Kris es naamelik getrâwtj met mien zus en zien vrâw Caroline.
De twieëdje adjudânt es Jeroen Wilbers met zieën vrâw Marieke, Saame hebbe ze twieë wichter, Tom en Ries. Hae waas de nachtvorst van V.V. Niks Dao en miene kammareaod uut deej klup. Auch ’t decor bâwwe doon vae saame.
Dan heb ich noch unne derdje adjudânt en det es Denny Hansen met zien vrâw Wendy. Zeuj hebben
twieë wichter, Faye en Quinty. Doeërdet os wichter saame oppe daagopvang zoote zeen vae vreeendje gewoeëre.
Dan hebbe vae ouch oeës gooj vriendin en mien eige klei-jerdaame in oeës gezelschap en det es
Ilona Wijntjes.
In mieën ongescheijing heb ich al mien hobbies trök laote koome. Unne wielrenner want dit hieët dieëze jong toch hieël waat jaor gedaon. ‘N paar potte verruf van ut decorbâwwe en ‘n fietswiel met Spijke, neteurlik umdet ich d’r eine van Spijk bin en dao bin ich gruuëts op!
Mieën orde hetj dan ouch:
Orde van ut Spijkske
Met dieës mînse in ‘t gezelschap en miene kleine collega Jeugdpreenses Mara en hieël Wieërt-Zuid gaon vae d’r unne geweldige vastelaovundj van maake, onger mien devies:
Met vôl plezeer en kuit. Vastelaovundj veere vae op Wieërt Zuid!
