Ad van Mierlo zurgtj vör de magie op ‘t dook
‘t Pensieël achter Boonte Aovendj
22 jaor lânk schildertj Ad van Mierlo de magie op ‘t dook. ‘t Zaalleecht gieët uut. ‘t Gerdien schuuftj oeëp.
‘t Ieërste waat ‘t publiek zuût es neet ‘ne grap of ‘n dânspas, mer ‘n werreldj dae ineins tot laeve keumtj: ‘n dorpsplein, ‘n kastieëlke, misschien zelfs ‘n tropisch eiland.
Achter di-j illusie schuultj al 22 jaor dezelfdje mins: Ad van Mierlo, de decorschilder vanne Vêrkusköp.
‘n Alpenlandschap as begin
Zien avontuur begos in 2002, bekans toevallig. “Mien ex Monique vroog of ich woeëj hêlpe. Jack Houben waas gestoptj, Joep Kessels noom ‘t oeëver, mer kos waal wat hûlp gebroeke. Zoeë roldje ich d’rin.”
Zien ieërste eige creatie waas ‘n Alpenlandschap met bêrge en sparre. ’n Beschei-jje begin, mer genog um ‘t te pakke. “Det memênt det eur wêrk ineins ‘t tenieël vultj enne zaal d’rin wurdtj mejgezoge… dao daojje ‘t vör.”
Veer meîsterwêrke
Vraog um nao zien 3 favoriete decors dan keumtj Ad metein met veer stuks. ‘t Kastieëlke oppe Beest, ‘n tropisch eiland, ‘t kêrkplein van Kieëntj en ’t bi-jzeûndjere decor met twieë hoêskamers en ’n verri-jbare moor. “Met zoeë ’n moor kószje in eîn beweging de hieële setting wissele. Twieë locaties in eîn sketch: dét vong ich schoeën.”
Waat di-j decors speciaal maaktj? “Herkinbare plekke uut Wieërt. As minse det zeen en zachtjes floestere ‘det es toch de Beest?’, dan weit ich det ich raak heb geschilderdj.”
Gein print, mer pensieël
In ‘ne tiêd woeë in digitale achterdeûk mekkelik besteldj kinne waere, keeszj de Boonte Aovendj bewusj vör de ambacht. Alle decors zeen nog altiêd mette hând geschilderdj. Det es uniek en es de vereîniging ouch zieër gruuëts um.
Ad haaltj zien inspiratie uut foto’s di-j hae zelf maaktj inne stad, mer dek ouch gewoeën uut ziene kop. “’n Decor mot gein plaetje zeen, mer ’n schilderi-j. Van achter inne zaal mot ‘t krachtig oeëverkome, mer van dichtbeej mojje nog steeds de vêrf strepe zeen. ‘t Mot laeve.”
Van latex nao acryl
De techniek verangerdje mej mette jaore. Ieërst wêrkdje hae met latex: eîmers vol, achtergelaote doeër ziene veûrganger. “Mer di-j laoge maakdje de panieële loeëdzwaor. En aszje ze bliefjt oeëverschildere, sprong de vêrf d’r gewoeën aaf.” Tegewoeërdig gebroektj hae acryl. Lichter, stêrker, mekkelikker te herstelle. “En gae kintj d’r net zoeë good naat-in-naat mej wêrke. Asof dejje ‘n echt schilderi-j maaktj.”
De stille kracht achter ‘t gerdien
Neet alles gieët altiêd vlekkeloos. Ad herinnertj zich ‘t jaor det hae per ongeluk halfglansvêrf kreeg. “Toen de spots aanginge glanszje ‘t hieële decor. Völ te fel! Vae hebbe d’r op ‘t lèste memênt nog ‘n matte laog oeëverhaer gezâtte. Zulke dinge vergaetdje neet.”
Toch mêrktj ‘t publiek dao zêldje iets van. Vör hun es ‘t vanzelfspraekendj det beej edere sketch ‘t juiste decor stieët. Vör Ad es det de groeëtste voldoening: det zien wêrk ‘t verhaol sterker maaktj zónger zelf de spotlight te pakke. “’n Decor mot de sketch drage, neet oeëverheerse. ‘t Mot veule asof dejje d’r middenin staotj.”
Groeëts en beschei-jje tegeliêk
Waat Ad nao 22 jaor nog steeds drieftj? “Iets groeëts make. Iets woeë det ich mien creativiteit hieëlemaol in kwieët kin. Vör mich es det de compensatie vör ‘n klein schilderi-jke of ‘n optochtwage. Gae zeetj de speulers d’r plezeer aan belaeve, gae huuërtj de zaal lache, en gae wetj: dao heb ich aan beejgedrage.”
Boonte Aovendj 2026 – zeetj de magie zelf
Gein veurstelling zónger de hang van Ad. Gein sketch zónger ‘n decor det de zaal mej neemtj. Belaeftj ‘t in 2026: drej aovendje vol humor, muziek én de schoeënste decors di-j Ad, same met alle gewêldjige collega decorbawwers, heef gemaaktj.
Kaarten: verkuskop.nl/kaartverkoop
