Al 33 jaor: Vae doon ’t same.
Bèr Raemaekers: 33 jaor lânk ‘t kloppendj hert vanne Boonte Aovendj
“Vae doon ‘t same” – ‘t es al sinds jaor eîn ‘t motto van Bèr Raemaekers.
Dit sezoên stieët hae vör de 33e kieër op of achter de buun beej de Boonte Aovendj vanne Vêrkusköp.
Neet allein as vertrawdj gezicht in sketches, mer ouch as regisseur, organisator en driêvendje kracht achter talloze acts.
Van huwelijksact nao Boonte Aovendj-icoon
‘t Begos allemaol met ‘n optraeje tiêdes ‘t 25-jaorig huwelijk van zien tante Annie en oeëme Twan.
“De schoeënbroor van tante Annie, Huub Stroek, zoog det optraeje en vroog aanne pisbak beej Beej Bertje: ‘Wildje neet mejdoon aanne Boonte Aovendj… op zuid?’,” lachtj Bèr. “Ich zag metein ‘jao’.”
Zien ieërste optraeje? ‘n Ingelsmân oppe stasie, same met Martje Stultiens, en as Henny Huisman in ‘n playbackshow. “ ’t Waas de combinasie van tenieëlspel én de gezelligheid d’r umhaer di-j mich metein pakdje. De spanning, de reacties uut de zaal… dao kreegdje ‘n kick van.”
Regisseur met ‘n missie
Nao jaore as spuuëler schoof Bèr doeër nao de regie en woort hae zelfs kop vanne commissie. “Ich vong ’t kej sjiek um te kieke wi-j dejje as groep tot ‘t beste resultaat kotj,” verteltj hae. Same met Pol Thei en later Marcel heel hae altiêd eîn dînk hoeëg: Vae doon ‘t same.
Det motto kwoom ouch trök toen hae mede-oprichter woort vanne Wichter Boonte Middig. “Nog zoeë ’n veurbieëldj van ’t same doon. Joonk talênt ‘n podium gaeve en zeen wi-j ze ‘tzelfdje plezeer belaeve as vae oppe Boonte Aovendj, det és goud waerd.”
‘t Regissere haaj ouch zien uutdaginge. “Soms moszje knoupe doeërhakken en beslisse. Det es neet altiêd leuk, mer aszje d’r oeëpe oeëver kaltj, dan kojje d’r altiêd aan uut.” De beloeëning? “De lach van ‘t publiek oppe Boonte Aovendj zelf. Det es onbetaalbaar.”
Druug Mik: druuge humor as traditie
De léste jaore kinne vae Bèr veurâl van Sint Joep enne vaste act Druug Mik, same met Charlie, Wil en Marcel. “ ’t Es eigelik as grapje begonne, mer waal met ‘n serieuze óngertoeën. Vae woeëje minse ouch boete de Boonte Aovendj laote geniete van oeëze flawwe kûl.”
Nowwe ideeë ontstaon dek ónger ‘t genot van ‘n glaas beer. “Gae haotj eur oeëre oeëpe, kiektj völ um uch haer en dan ineins hejje weer ‘n sketch. Titanic, Frozen, Boegie, Tennis… det zeen vör mich huuëgdjepûnte.”
Huuëgdjepûnte en zieënuwe
In 33 jaor zeen d’r talloze bi-jzeûndjere memênte geweisj. “ ’t Jubileumjaor, toen vae ‘n complieët theater bawdje, de samewêrking met Blizz, en neteurlik De Waerse Ku-j. Mer eigelik es eder jaaor bi-jzeûndjer doeër de reacties van ‘t publiek en de gewêldjige groep woeë mej vae ‘t doon.”
Neet alles gieët vanzelf. “Minse weite ‘t misschien neet, mer ich zoot eder jaor stiêf vanne zieënuwe inne schmînk. De vröllie en hieëre vanne schmînk sleîpdje mich d’r altiêd doeërhaer.”
Onmisbare schakel
Vör Bèr beteikentj de Boonte Aovendj mieër dan allein ‘n optraeje. “ ‘t Huuërtj beej ‘n geslaagdj sezoên vanne Vêrkusköp. Vae breenge plezeer beej joonk en aod, en det geeftj energie.”
Hae zoog de aovendj verangere. “Alles es völ moderner gewore en mieër passendj beej de tiêd.” Oeëver de tôwkomst zeet hae met ‘n glimlach: “As ich oeëver tieën jaor nog mejdoon, bin ich 77… det es best aod. Mer zeg noeëts noeëts.”
Waat hae hooptj det minse onthaoje? “Det vae ‘t same doon. Ich bin gruuëts det ich dao al di-j jaore óngerdeil van mocht zeen.”
‘ne Mins van buun én coulisse
Bèr Raemaekers waas en és völ mieër dan ‘ne spuuëler. As regisseur, organisator en creatieve motor heef hae de Boonte Aovendj mej gevormdj tot waat ‘t noow es: ‘n moderne, strak georganiseerdje en geleefdje traditie di-j jaor nao jaor volle zale trektj. Zien beejdrage, zoeëwaal zichtbaar as achter de schêrme, heef de lat hoeëger gelagdj vör alles waat d’r op de buun gebuuërtj.
Kotj nao de Boonte Aovendj!
Mis ‘t neet en beleef ‘t zelf. Kaarte zeen te kriêge via verkuskop.nl/kaartverkoop.
