De wichter en aojers di-j in de aafgeloupe jaore, zek mer gerösj: inne aafgeloupe 15 jaor, deel hebbe uutgemaaktj vanne Jeugd Vêrkusköp weite precies waat bedoeldj waertj met “De kamelerace”. De kamelerace es inmiddels ’n begrip gewoeëre en meinig jeugdige, aojers, begeleiders en ângere betrokke vanne Vêrkusköp hebbe waal ’s as ‘ne kamieël stoon hobbele inne zaal, achter de schêrme, oppe bühn of zelfs inne bus. ’t Maaktj niks uut, oeëveral woeë efkes tiêd oeëver es, de sfeer gebrachtj mot waere of gewoeën vör de gekke jen wurdj de kamelerace gedoon.
Mer waat mot ‘ne gemiddeldje vastelaovendjveerder zich dao beej vuuërstelle? Nou, ’t zitj zoeë. Kujje de kamelerace vanne kêrmis? Dét es ’t neet! Gae dootj net as dejje op ‘ne kamieël zitj, en haotj um dus vast as of dejje ’n paerd tösse eur bein hetj met teugels. Mér dae kamieël es altiêd hieël ongeduîldjig, dus gae hobbeltj wat op en nieër. Gae stootj dus te treepele oppe vloer, en blieftj waal stekke oppe zelfdje plek (inne bus treepeldje met eur veut oppe vloer terwijl dejje zitj, en slaotj op eur boêvebein vör extra effect). Tiêdes de race op eûre
kamieël kome ’n aantal elemênte vörbeej. Det es namelijk: dé waterbak. En gae kintj waal raoje waat det es?! ‘ne Kamieël waszj ziêne snoêt dao in. Dus met eur hang vuuër eur gezicht daojje net asof dejje eur gezicht waszj. Geluide moge dao beej gemaaktj waere!! “Brrrrr”.
De kamieël keumt hordes tege woeë dejje oeëver motj spreenge. Mer ouch waere d’r bochtjes gemaaktj nao leenks en nao recht. Dan hângdje gewoeën efkes opzi-j. En jao, det kin ouch inne bus. Ónger weges motte kamieël, dae dejje nog steeds vast hetj aanne teugels, stoppe vör eendjes. Det zeen d’r altiêd 4 “eendjes, eendjes, eendjes, eendjes.” En di-j wuive vae eîn vör eîn langs met eîn hand. Eur ânger hand bliêftj d’n teugels vast haoje.
Ouch vör ’n defilé motte kamieël efkes pas oppe plek haoje en wuive vae zoeë as de kuuënigin det deut. Dao kieke vae dan ouch hieël deftig beej. Al dieës opstâkels kome willekeurig langs doeër de kamieëledriêver dae ’t veurtaw neemtj inne race. En gae kintj uch waal bedeenke dette race de eîne kieër langer es dan d’n ângere kieër, en eder jaor waal weer ânger elemênte beej verzonne waere! Met ’n eindsprint vleegdje uuteindelik de bus uut, de zaal in, of nao de bar. Det es mer net woeë dejje zeetj. Zoeë zeen al hieël wat stom streek vörbeej gekome en kieke vae eder jaor weer uut nao ‘ne nowwe race.
Zeeje nowsgierig gewore? Laotj uch dan neet tege haoje um ’s te prebieëre. Vae weense uch hieël völ plezeer mette kamelerace.
P.s. Gaeftj eure kamieël ouch ’ne naam!
Leefs, de Jeugdcommissie!
