Doeërdet d’r aafgeloupe jaor te weînig daelnemers ware, kós ’t Wieërter Vastelaovendj Lidjes Festival (WVLF) neet doeërgaon. Vastelaovendjvereîniginge de Rogstaekers, de Brökwagters en de Vêrkusköp hebbe echter de hâng ineîn geslage en zich ingespanne vör ‘ne doeërstart en daomej ‘ne trökkieër van ’t festival. Centraal stieët um ’t producieëre van Wieërter vastelaovendjmeziek aan te bliêve moedige en artieste zoeë mekkelik muuëgelik de gelaegeheid te gaeve um mej te doon.

Finale

Det alles hieët d’r in gerizzeltieërdj, det mer leefst nuuëge daelnemers zich hebbe aangemeldj. Di-j zulle met eur lidje aantraeje tiêdes de finale op zoondig 26 jannewarie 2025. Weem ’t Wieërter Lidje van ’t Jaor en de beejbehuuërendje Fried van Dooren Wisseltroffe gieët winne, kujje dan vanaaf 13:30 oor mejmake beej Stadscafé De SooS oppe Mêrrentj. Pebliek, det vuuër 14:00 oor aanwieëzig és, kriegtj ’n stemkaart, woeëmej ze net as de veer vakjury’s eure vuuërkuuër kinbaar kunne make. Daobeej kân gekoeëze waere uut lidjes van De Köpkes, Deindânger, Laurens Vossen, Linda Heuvelmans, Mark Gruijthuijsen / W11, Moerepetazie, Ronald & Carien, Stefan Wolter en Waers. Mieër informatie keumtj de kaomendje tiêd beschikbaar op www.wvlf.nl