Interview met adjudant Henk
Leef Vêrkusköp
Gaer wil ich michzelf effekes aan uch vuuërstelle: Ich bin Henk Stultiens, 45 jaor en getrawdj met Anouk Wijen. Same zeen vae de aojers van Floor. Dieës twieë dames hebbe allebei-j de ieër gehadj um borebruudje te zeen heej op Wieërt-Zuid: Floor vuuërig jaor beej de jeugd tiêdes de geweldjige jubileumeditie 2×11 en Anouk in 2016 (neet beej de jeugd mot ich heej stiekem beej zegke).
Mien aojers zeen Riny van de Werken en Hennie Stultiens. Ouch heb ich twieë zösters: Hanneke en Petra. Waat bin ich gruuëts det Patrick, woeë-mej ich al dik 25 jaor bevreendj mej bin, mich heet gevraogdj um ein van zien adjudânte te zeen!
Ein van mien hobby’s es voetbal en maak ich deîl uut van ’t gezelligste elftal van MMC, ’t veerdj. Ich heb zoeë ‘n 3 jaor met Patrick same met Patrick same beej Oda gevoetbaldj. Later stonge vae dèk tieëgenoeëver elkaar op ’t veldj, en ieërlijk gezagdj gieët ’t d’r dan neet altiêd vrîntjelijk aan tow….Mer inne derdje helft stoonge vae vervolges as kameräöj met ’n pilske inne kantien. Daonaeve staon ich oppe pedale beej de MOT, Men Only Tour. Ouch bin ich lid van nog ’n anger fietsclubke: de ZAT, oftewaal Zaoterdig Altiêd Trappe. En laote vae de wîntjersport neet vergaete: same met mien gezin en vreendje lekker skieêje in Oeësteriêk.
Doeër de waek bin ich schadehersteller beej Autoschade Huub van Mierlo in Zuûmere. Tiêdes de vastelaovendjtiêd kumtj mien vak good van pas: al ’n aantal jaore moog ich de schoeëne wage van ‘BC Wieërters Echte’ vörzeen van ’t letste läögske lak. Dèk op ’t allerletste momênt, oppe zaoterdigmiddig as de optocht van Wieërt-Zuid al doeër de straote trektj. Ouch staon ich mette vastelaovenj altiêd ’n paar daag mette jònges achter de baar beej de Soos. ’t Liektj misschien op wêrke, mer ’t es vöral plezeer.
Laote vae d’r dit jaor weer ’n geweldjig fieëst van make, ich heb d’r in eder geval ontzettendj völ zin in!
Fieëstelijke groet, Henk
