Interview met adjudant Maarten

Ich zal mich efkes vuuërstelle, ich bin Maarten Stijnen, geboeëre in ’t Sint Jansgasthoês in Wieërt. Mien jeugd heb ich altiêd doeërgebrachtj op Groenewoud. As ich neet êrges roondhing, dan zoot ich of inne schoeëlbânke vanne Martin Luther King schoeël en later inne bânke vanne Philips van Horne SG, of waas ich te veenge op ’t voetbâlveldj van Wilhelmino ’08 en later  op ’t veldj van Megacles.

Ich kos oeëze hoogheîd al as tegestander van Wilhelmina, schoeëlgenoeët vanne ‘Philips’ en as teamgenoeët beej ’t selectievoetbâl. Mer beej Megacles es oeëze vreendjschap met oeëze hoogheîd echt ontstaon. Beej Megacles haaje vae vreuger ’n gruupke, de ‘Vatos Locos’. Mette ‘Vatos Locos’ wore vae op zaoterig dèk te veenge oppe Oelemerrentj. Op donderdigaovendj gonge vae geregeldj nao de ‘tietenshow’.

Uuteraard veerdje vae ouch same Vastelaovendj, dit deeje vae altiêd in ’t Buurthoês op Moesel.

Vreuger, lang geleeje, zoot mien groeëte broor beej V.V. Ongelagdje eijer. As opvulling heb ich înkele kieëre mejgeloupe inne Groeëte Rogstaekersoptocht. Vastelaovendj veere doon ich hieël gaer, mer eigelijk alleîn mer oppe ‘achtergroond’. Daorum ving ich ’t geweldjig um ein vanne adjudânte te zeen van Preens Patrick I. Heejmej bin ich de twieëdje adjudânt van oeës gezin. Mien klein breurke es in 2014 adjudânt geweisj van Rogstaekerspreens Lennart I.

Ich bin nao Megacles beej SV Moesel (Later MMC Wieërt) gaon voetballe. Dao heb ich Suzanne Princen lieëre kinne. Halverwege 2009 zeen vae getrawdj, same hebbe vae twieë dochters, Renske en Lobke. Vae woeëne aanne angere kânt vanne knaal op Hushove. Vastelaovendj vere vae dan ouch onger ângere beej de Brökwagters op Bosseve. Renske, oeëze aodste dochter, zaot inne Coronatiêd beej de jeugdraod van elf van 2021 vanne Brökwagters. Det waas ondanks de Coronatiêd hieël speciaal. Lobke heet dit jaor inne jeugdraod van elf vanne Brökwagters plaatsgenome. Vör os dit jaor dus ’n extra druk program! Mer waal echt super sjiek!

Doeër de waek wêrk ich beej Breedewegh BV, ’t bedriêf van mien groeëte broor, as Project Engineer. Dao ontwêrp ich onger ângere ’s werreldjs beste formaatsets vör verticale verpakkingsmachines.

Voetballe doon ich helaas al ’n tiêd neet mieër, dus um toch nog ’n bitje sportief bieëzig te zeen bin ich gaon darte. Ieërst beej de Microbar en later zeen vae noeëdgedwonge verkasj nao de Wertha Brewpub en vervolges nao café de Hook.

Ich heb ’n passie vör oldtimers en bin in ’t bezit van ‘ne Ford Cortina GT uut 1965, dae liktj op dit memênt hieëlemaol uut-ein mette bedoeling um dieëze op te knappe. ’n Bepaaldj óngerdeîl vanne Cortina heet mich in 2021 ’n nominatie opgeleverdj vör de Gouwe Lambieck. Umdet de ‘Tina’ uut-ein liktj heb ich erges ‘ne Ford Escort XR3i cabrio uut 1986 oppe kop getiktj um toch met good waer ’n bitje plezeer te hebbe met ‘ne veerwieler. Net as oeëze hoogheid bin ich ‘ne echt Ford-man.

Ouch es koeëke, BBQ-en pizza’s bakke ’n soeërt hobby van mich. Zondigs mette Groeëte Rogstaekersoptpcht neem ich de Vastelaovendj-barbecue mej, want woeë gedroonke waerdj mot ouch gegaete waere zag os pap altiêd!

Zoeë, det waas ‘ne korte intro van ein vanne adjudânte van Preens Patrick I.

Vae gaon d’r same met dit fantastische gezelschap ‘ne schoeëne tiêd van make.