Interview met Preens Patrick I
Leef Vêrkusköp en Vêrkusköpkes,
Vör sommige minse es ’t misschien geîn verrassing det ich de nowwe Preens vanne Vêrkusköp bin, mer ich kan uch vertelle… vör mich waal! Ich zal uch ouch effe uutlegge woeërum. Op ‘ne donderdagavondj laat loog ich met mien gezin nog effe boeëve op bed nao de penalties van AZ te kieke, toen ich ónger iets huurdje. ‘D’r es eemes binnen!’. As ‘ne heldj op zök ging ich met gebalde vuiste nao ónger tow en schrok mich ‘n ongeluk toen ich inne woeënkamer kwoom.
Dao stonge de preensebegeleiders vanne Vêrkusköp in mien keuke!
Vae woore hieëlemaol vergaete de deur op slot te doon…Gaw mien vraw d’rbeej gerope en nauwelijks vanne schrik bekome kreeg ich nao ‘n tiedje gekaltj te hebbe de vraog gesteldj: “Wildjae de nowwe Preens vanne Vêrkusköp zeen”? Dao schrok ich mich nog ‘ne kieër kepot, want vuuëraan staon op di-j bühn en in di-j microfoon kalle? Nein, det es toch hieëlemaol niks vör mich? Ich bin eemes vanne achtergrond, toch?
Mer stiekem haaj ich heej waal oeëver gedraumdj. En nao er efkes rustig oeëver te kalle, ‘n paar daag te laote bezînke, kwome mien vraw en ich totte conclusie: dit es toch geweldjig! Waat zulle mien pap en mam trots zeen! En ich doon dit neet allein, vae hebbe ‘n geweldjig gezelschap um os haer en vae doon dit met ‘n fantastische vereîniging. Det kumtj hieëlemoal good!
En noow esj het dan zoeëwiet. Mien naam es Patrick Salmans, 47 jaor aod, gebore en getoge op Moesel in Wieërt, oppe Engelbrechtstraot. Ich bin ‘n zoon van Gerard en Tiny Salmans di-j geîn onbekindje zeen beej de Vêrkusköp .
Os pap es 2 kieër Adjudânt gewaesj en same met os mam hebbe ze met völ leefdje jaorelank de hoeëghede, adjudânte en raodsleeje vanne jeugd begeleîdj. Achter de schêrme zeen ze nog steeds betrokke as ieërelede.
Met vastelaovendj zeen mien zus Wendy en ich van kleîns aaf aan opgegruuëdj. Os pap en mam nome os mej nao ‘t Buurthoês enne Poort van Limburg, woeë vae vuuëraan inne hal feîn koste spuuële terwiêl os pap en mam inne zaal d’r eine (of twieë) koste drînke. ‘t Es dan ouch neet gek det ich mien zus hieël gaer as adjudânt d’r beej woej hebbe. Same met os pap en mam hebbe vae diverse jaore met geloupe inne optocht vanne Vêrkusköp met V.V. De Baekvagers vanne Bosverbeek, woeë mien roots vanne femiliê Salmans ligke. Nog altiêd woeëne heej oeëmes en tantes van mich.
Ouch wejdet ich aojer woort, bin ich altiêd vastelaovendj blieve veere. Gae kosj mich met di-j daag same met mien kameräöj veenge inne kefees inne stad. Al bekans 25 jaor doon vae met völ plezeer mej mette jaorlikse zeskamp op Moesel as team ‘De Slechte’. En met ‘n vast kliekske gaon vae same mette wichter eeder jaor ‘n weekendje weg. 3 van dieës manne staon noow naeve mich oppe bühn um dit fieësje same te veere.
Voetbal es altiêd mien passie gewaesj en heet lânk op nummer 1 gestange. As klein menneke bin ich begonne beej mien jeugdliefde Megacles. Heej heb ik altiêd met völ plezeer gevoetbaltj tot en met ‘t 1e elftal. Heej-mej z’n vae zelfs kampioen gewore!
Daonao heb ich de overstap gemaaktj nao FC Oda op Bosseve, woeë ich ouch ‘n geweldjige tiêd heb gehadj en völ nowwe vreendje heb gemaaktj. Net wi-j ich eigelik de beslissing haaj genome um nao de veterane te gaon ging ’t mis en bin ich met ‘n kepotte kneej in eine kieër motte stoppe.
Noow ich neet mieër kin voetballe heb ich gelökkig ‘n nowwe hobby en sport gevoonge. Eedere zoondig fiets ich oppe mountainbike same met ‘n hieël gezellig clubke, de MOT. Neteurlik sloête vae altiêd aaf beej de Tram vör ‘de derdje helft’. As ’t doeër de waek schoeën waer es fiets ich ouch nog waal ’s oppe racefiets.
As klein menke ging ich nao basisschoeël De Zevensprong, later koszjae mich veenge oppe Philips van Horne woeë ich de Havo heb gedaon. Nao ‘n tussejaor op ‘t MEAO in Wieërt bin ich in Eindhoven HEAO bedrijfseconomie gaon studere um vervolges as bookhaoijer aanne slaâg te gaon beej de Ford dealer Jan Op ’t Root in Remunj. Inmiddels z’n vae al twieë kieër oeëvergenome, mer ich werk d’r nog altiêd, tegewoordig as Financieel Controller vör Van Mossel Ford BV met 14 filiale in hieël zuid Nederland. Mer mien bureau stieët nog altiêd in Remunj. Noow snapdjae ouch woeërum ich altiêd in ‘ne Ford ri-j.
27 jaor geleeje heb ich ‘t allerleefste maegdje van Neejwieërt lieëre kinne, vanaaf di-j tiêd zeen vae al beej-ein en inmiddels al 17 jaor gelökkig getrawdj. Ze hetj Vivi Gielen en gae kintjse misschien waal van di-j schoeën wînkel oppe Kerkstraot in Neejwieërt, Bath&Living, woeë detze schoeën spölle hebbe vör eur badkamer en slaopkamer. Zoeë neet, dan gaotj mer ’s ‘n kieër kieke.
Same hebbe vae 2 heerlijke zuuënkes, Devi van 14 jaor en Tijs van 12 jaor, en woeëne vae oppe Nassaulaan heej op Moesel.
De afgeloupe 2 jaor hebbe vae al ‘n geweldjige tiêd moge mejmake beej de jeugd van dieës schoeën vastelaovendjvereîniging. Ieërst met Devi inne jeugdraod van Jeugdpreens Milo I en afgeloupe jaor met Tijs as adjudânt van Jeugdpreens Tren I.
Wieter zit ich in ‘t bestuur van Wieërt Zuid Events woeë-mej vae ‘t aafgeloupe jaor vör d’n ieërste kieër ‘t Halfvastebal hebbe georganiseerdj in ‘t Buurthoês. Dit jaor kumtj de twieëdje editie met geweldjige artieste en zeeje allemaol weer van herte welkom!
As dejjae good kiektj nao mien ongerscheijing dan zeeje înkele details di-j ich uch net heb verteldj. De bâl stieët neteurlik vör ‘t voetbâl, ‘t lint en ‘t tenue hebbe de kluuëre van Megacles. De mountainbike liektj mich ouch waal duudelik. ‘n Anger schoeën detail zeen de griês haor, want ich waas al hieël vreug schoeën zilvergriês.
De sjaal stieët symbool vör mien reputatie det ich ‘t altiêd snel kaod heb. Wieter bin ich gezaegendj met twieë lînkerhang, daorum heb ich gekoeëze vör mien “Orde van ’t Kaod Kluuëtje”!
Same met uch en met mien gezelschap gaon vae d’r ‘n fantastische vastelaovendj van make heej op Wieërt Zuid. Det doon vae ônger mien devies:
‘Met voetbâl in ’t hert en ’n fiets ónger de koont, fieëste vae dieës daâg de klok roond!’
Vae hoeëpe uch dek te zeen in ’t buurthoês en weense uch ‘ne hieële feîne vastelaovendj!
