Jeugdpreens Guus I
“Woojoow!!” woor mien ieërste reactie wi-j ich gevraogdj woort um Jeugdpreens te waere vanne Vêrkusköp 2025. Det beteîkendj ‘ne dikke vette Jao! En eindelijk moog ich ’t uut kake nao 5 maondj mich stil te hebbe motte haoje.
ICH BIN JEUGDPREENS GUUS D’N 1e VANNE VÊRKUSKÖP!!!!
Ich stel mich efkes vuuër, dus laeszj veurâl efkes wieter.
Ich bin Guus de Bruin en bin eîne kieër twelf jaor aod. Mien pap en mam zeen Rolf en Cindy de Bruin. Ouch heb ich nog ’n zös, en det és oeës Kiki. Same woeëne vae oppe Maaseikerweeg.
Doeër de week bin ich al jaore ein van de kleinste, mer waal de netste op Brej Schoeël Moesel. Heej zit ich in groep 8 beej juf Daphne & juf Nassira.
In miene vri-jje tiêd bin ich eedere vriêdigaovendj te veenge op Fatima, beej scouting St. Rumoldus. Daonaeve stamp ich gaer tege unne bâl beej MMC.
Di-j ânger daag vanne waek bin ich drök met rippetieëre vör de Wichter Boonte Middig vanne Vêrkusköp, woeë det ich al hieël wat jaore schoeën rolle heb gehatj. Ich oefen mich de börste op di-j wieërter tekste, want det plat kalle doon ich allein mette vastelaovendj. Mer umdet ich dit zoeë leuk ving, heb ich de orde ingesteldj van:
“Ut actieërendj voetballerke”
Naeve det vae dit jaor weer ’n schoeëne Jeugdraod van 11 hebbe woeëmej ich ’t daak d’r aaf gaon fieëste, heb ich ouch nog 2 Adjudânte. Det kos neteurlik neet ontbraeke! Mien adjudânte make dit vastelaovendjs sezoên zeker complieët, want as dejje ’t hetj oeëver “vastelaovendj mette paplieëpel ingegaeve krieëge” zeen ’t Janelie Bruijnen en Vince Welmans waal.
Mette jeugdraod van 11 dae bestieët uut: Jayno Jacobs, Tijn Reijnders, Jelle Rutjens, Fay Bakker, Caydee Sijben, Siem Geraats, Fay Betzel, Dies Clerx, Keano Ramakers, Floor Stultiëns & Noa Geelen, en alle aojers, breurkes en zösterkes gaon vae de vastelaovendj van 2025 doeër. En det doon vae ónger mien devies:
“Ut dook gieët aanne kânt, noppe inne kast, ich bin Preens dus haotj uch mer vast!!!!”
En mien devies heet neteurlik ouch alles te make met mien hobby’s. Kotj kieke wi-j det dook aanne kânt gieët beej de Wichter Boonte Middig op 9 Fibbrewari, of kotj nao ein van oeës ânger activiteite in ’t Buurthoês. Hopelijk zeen vae dein danger! Dan fieëste vae same ’t daak d’r aaf.
