Nao 22 jaor Boonte Aovundj es dit John Koppen zieën lèste jaor

door VV de Vêrkusköp · Gepubliceerd 2 februari 2017 · Geüpdatet 2 februari 2017

john Naodet ich in 1991 en 1992 Preens van V.V.de Vêrkusköp bin gewaesj, woort ich in 1994 gevraogdj doeër Pol Verkennis en Thei Lenders, de kemmissie Boonte Aovundj, of ich ut leecht woeë-j bedeene tiêdus de Boonte Aovundje. Det heb ich ein jaor of 4 gedaon. Ein paar artieste stopdje en toen vroog Huub Stroeks zaliger of ich neet me-j woeë-j gaon speule. Ich vóng det neteurlik geweldjig en heb medeîn jao gezagdj. Vreuger heb ich beej de Rogstaekers ouch 2 jaor metgedaon met ut kabaretgruupke Schöppe Dre-j as drummer in ein kombootje.

john2 Ich begos met klein rölkes inne Boonte Aovundj en ut woort eeder jaor ein bitje mieër. Zoeëwi-j de Heilige Antoeënius en beej de Chinees en nog mieër ânger. Vae hebbe traone gelache achter de koelisse. Daonao kwoom ich beej de Hieëre van Sint Joep. Zelluf vóng ich det ein geweldjige ekt, woeëbeej de politiek en ânger bekîndje gezichte van Wieërt-Zuid oppe hak woorte genoome. Spesjaal vör de Hieëre van Sint Joep kwoom Aod-Börgemeister Niederer van Wieërt vanoet Roosendaal nao Wieërt um de Boonte Aovundj te bekieke. In 1999 woort mieën vrawke Sonja gevraogdj um de artieste te gaon sjmeenke en det deut ze met völ plezeer. De aoj garde heel dur me-j op.
john3

Nao de kêrmis beginne vae met rippetieëre en eeder waek wuuërdj dur völ gelache ónger ut genot van ein fleske beer. Vae hebbe in di-j jaore geweldjige stökke gespuuëldj, zoeëwi-j ut zwumbad, de vèsboor, de cruise en nog völ mieër stukke. De humor ligkt op straot.Ut waas ke-jsjiek enne Boonte Aovundjgroep es ein femilie. Gelökkig es dur vanoet de Wichter Boonte Middig aanwas nao de groeëte Boonte Aovundj, want di-j motte ouch de kans krieëge.
Nao 22 jaor Boonte Aovundj es dit mieën lèste jaor en saame met Sonja gaon vae dur me-j stoppe. Vae weense de Boonte Aovundj artieste nog hieël völ jaore suukses. Vae wille gaer eederein bedânke vör dieës 22 jaore lôl en flawwekûl met weem vae saamegewerriktj hebbe. Ouch ut pebliek bedânktj vör de lach ennut applaus in al di-j jaore.