VV de Vêrkusköp

Preens Patrick d’n 1e

door · Gepubliceerd · Geüpdatet

Ich bin Patrick Salmans, 47 jaor aod, ‘ne zoeën van Gerard en Tiny Salmans di-j jullie allemaol kinne as 2 minse di-j met hieël eur hert al 100 jaor ofzoeë, betrokke zeen beej de jeugd vanne Vêrkusköp. Van kleîns aaf aan bin ich same met mien zus Wendy me-j gewaesj en koszje mich altiêd al in ‘t buurthoês vînge.

Ich wêrk al bekans 25 jaor as Financieel Controller beej Ford Dealer Van Mossel in Remunj. Voetbâl is altiêd mien passie gewaesj, begonne as kleîn menneke beej Megacles en later mien carrière ’n vervôlg gegaeve beej FC Oda, woeë ich noow nog steunendj lid bin. Actief voetballe gieët helaas neet mieër vanwege ‘ne kepotte kni-j mer gelökkig heb ich ‘n nowwe sport gevoônge. Eedere zondig fiets ich oppe mountainbike same met ‘n hieël gezellig clubke, de MOT, en sloeët dan aaf beej de Tram vör de derdje helft. As ‘t doeër de waek schoeën waer es fiets ich ouch nog waal es oppe racefiets. Wieter bin ich ouch betrokke beej Wieërt Zuid Events woeëmej vae aafgeloupe jaor vör d’n 1e kieër ‘t Half Vaste Bal georganiseerdj hebbe in ’t Buurthoês Moesel.

Ich bin getrawdj met ‘t allerleefste maegtje van Neejwieërt, Vivi Gielen. Gae kindj ze misschien ouch van di-j wînkel op de Kerkstraot in Neejwieërt woeë ze schoeëne spulkes verkoupe vör eure badkamer of slaop-kamer. Zo neet, zieëker aan te raoje um ‘ne kieër te gaon kieke. Vae woeëne oppe Nassaulaan en hebbe 2 fantastische zoeëns Devi en Tijs.

Naeve mien gezin heb ich ouch adjudânte nuuëdig um d’r ‘n geweldjig fieëst van te make. Gaer stel ich uch vuuër aan mien beste dre-j kameräöj:

  • Patrick Lenders met zieën vraw Anita en dochters Romy en Laura.
  • Henk Stultiëns met zieën vraw Anouk en dochter Floor.
  • En Maarten Stijnen met zieën vraw Suzanne en dochters Renske en Lobke.

Now zoeëdje zegke, vae zeen complieët, mer nein zoeë veultj ‘t nog neet. Ich mis nog eemes di-j ich d’r hieël gaer beej woeëj hebbe.

Ich weît detze dit fantastich vînktj, neet haaj verwachtj en ich gun ‘t ‘m hieël erg um met mich same oppe bühn te staon. De minse inne zaal kinne ‘m misschien baeter as inventaris beej de supermêrrentj heej op Wieërt-Zuid. Mien veerdje adjudânt is mien zus Wendy same met heure mins Eric Jacobs en dochters Sanne en Lieke.

Ich staon bekindj as eemes dae ‘t altiêd as ieërste kaod heet en um mien twieë leenker hang. Daorum heb ich de orde ingesteldj van:

’t Kaod Kluuëtje

Vae gaon d’r same met uch de komendje waeke ‘n schoeën fieëst van make heej op Wieërt Zuid.

Det doon vae ônger mien devies:

Met voetbâl in ’t hert en ’n fiets ónger de koont, fieëste vae dieës daâg de klok roond!