Mien naam is Kay Betzel, 44 jaor en gebore in Blierick. Naodet vae 12 jaor in Tegele gewoeëntj hebbe zeen vae verhoesj nao Wieert-Zuid oppe Graasweenkel. Daonao bin ich nog 3x verhoesj binne Wieert-Zuid en woeëne vae noow oppe Graâswînkellaan tegenoeëver de schoeël. Ich bin ‘ne zoeën van Wim en Ans Betzel. Os pap en mam hebbe 30 jaor ‘n optiek en huuërtoestelle zaak gehadj inne stad aanne merrentj. Dao wêrk ich inmiddels al ruuem 20 jaor als audicien. Nao bekans 20 jaor met os pap en mam same te hebbe gewêrktj genete di-j inmiddels van eur welverdeendje pensioen.
Ich bin dit jaor 16 jaor getrawdj met Kim Tinnemans uut Ell, en same hebbe vae 2 leuke tieners. Sten van 15 en Fay van bekans 13, allebei aod jeugdraodslede vanne Vêrkusköp. Tiedes dieës 2 jaore hebbe vae as gezin de Vêrkusköp van dichtbeej mej gemaaktj en hieëlemaol in oeës hert gesloeëte.
In mien vreeje tiêd bin ich völ in ‘t zwömbad te veenge vuuër ‘ne stevige pot waterpolo, al jaore spuuël ich in ‘t 2e en gezelligste team van ZPV de Rog. Wieter bin ich trainer en coach van ‘t jeugdteam van oeëze zoeën Sten. Ouch bin ich ‘ne trawwe supporter van oeës Fay det beej de D1 van Meos handbaltj. Mochte d’r in ‘t weekend geîn wedstriêde geplantj zeen gaon vae geregeldj met kammeräöj vèsse, leefst onger ‘t genot van ‘n pilske en gezellig waat aojhore. Mocht d’r dan nog waat tiêd oeëverblieve kroêp ich nog gaer vör ‘n röndje oppe motor.
Vastelaovendj heb ich van toês oet al van jongs aaf aan van os pap en mam mejgekrege, mer toch vuuëral van os mam di-j krom zin kriegtj as os pap vuuërsteltj um mette vastelaovendj ‘s ‘ne kieër op vekansie te gaon. Vae veerdje vastelaovendj altiêd met os hieële gezin mer ouch mette femîelie en vreendje, same d’n optocht kieke en daonao fieëste inne zaal of kefee en det doon vae noow nog altiêd. Eederein wetj altiêd drèk woeë vae staon, ze hove allein mer te zeuke nao os schoeëne lâmpekap di-j vae al zeker 15 jaor mejsjouwe.
Det es ouch de reeje det ich d’n orde vanne Soppendje Lâmpekap heb ingesteldj.
Dieëze schoeëne tiêd gaon vae neteurlijk same met minse di-j os hieël leef zeen vere. En daorum stel ich gaer mien adjudânte aan uch vuuër.
Mien ieërste adjudant is Patrick Konings, same met zien maegdje Patricia en eure zoeën Dean. Same dreenke vae gaer ’n pilske, gaon vae op vekansie, reeje motor, vèsse en hobbye waat aaf.
Mien twieëdje adjudant is Rob Wijnhoven, same met zien vraw Chrysi, dochter Isabella en zoeën Manos. Mede bedeenker vanne lâmpekap en vastelaovendjveerder in hert en nere.
Ieërder neumdje ich al det vae vastelaovendj altiêd mette hieële femîelie vere, daorum moog as derdje adjudante mien zöster Sharon Betzel zeker neet ontbraeke. Same met ziene vreendj Guido en zoeëns Guus en Sjors vere di-j ‘t hieële jaor doeër vastelaovendj.
Same met mien gezin, mien adjudânte en eure aanhang mer zeeker ouch met Jeugdpreenses Isa I, eur gevôlg en jeugdraod mèr zeker ouch met uch ammaol gaon vae d’r ‘n fantastisch fieëest van make onger mien devies:
Mette Lâmpekap vuuërop, zette vae hieël Wieërt-Zuid oppe kop!
