Uit de Gazet: Nog ein woeërt van Aod-Jeugdpreenses Veerle I
Allerieërst herstikke bedânktj det ich eur jeugdpreenses 2019 mocht zeen. Waat heb ich genote van dit vastelaovendjssezoên. Vanaaf daâg 1 det mien preensessebegeleiders Roy en Jasper mich vroge. Daonao ieërst mien adjudântes Faye en Lotte gevraogdj en neteurlik zagte di-j JAO. Mien orde en devies haaj ich zoeë gevoonge en mét ‘t óntwêrpe van mien medalie hieëf Robert mich good gehôlpe. Ich kos nog geîn plat Wieërts kalle vör miene speech, mer det hebbe mien preensessebegeleiders en os pap d’r beej mich good ingestâmptj. Al di-j vergaderinge beej os thoês, de foto’s make, waat woor det gezellig en waat hebbe vae völ gelache. De generale rippetitie op ‘n geheim locatie en toen de uutroping op 25 jannewari.
Vae haaje ‘m undercover laote gaon beej os inne Jeugdraod
Ich kwoom op métte Jeugdraod, mer oppe buhn haaldje ze mich d’r uut. Ich kreeg ’n masker op en kwoom allein trök. Dao stéldje Vorst Dennis mich allerlej vraoge en uuteindelik mocht ich ‘t dan uutkake…… Ich woor de now Jeugdpreenses vanne Vêrkusköp…Ich woor Preenses Veerle 1. Oongertösse det vae os ginge umkleî-je, woort de hieële Jeugdraod geïnstallieërdj en ouch Stan van Dijk. Vae haaje ‘m undercover laote gaon beej os inne Jeugdraod want ‘n waek later zooj hae waere geïnstallieërdj as Jeugdpreens vanne Rogstaekers. Daonao kwoom de installatie van mich en mien adjudânte. Daen aovendj hebbe vae d’r ‘n flînk fieëst van gemaaktj op Wieërt-Zuid. Mét ’n optraeje van Fiorenza (nemes kos ze noch mer vanaaf dae daâg kintj edereîn heur op WieërtZuid). Daâgs d’r nao woort Wesley Steuten uutgerope as miene groeëte vuuërgânger en vervânger van os Pap op Wieërt-Zuid.
..ich kos waal wat Wieërts kalle mer nog neet vör de volle 100%.
Speciaal woor toch waal ‘t Jeugdpreensetreffe in d’Indj. Sjiek um zoeë völ Preense en Preensesse te zeen. Ich woor ’n bitje ónröstig vör de opnames mét “Vrouwtje Televisie”…want ich kos waal wat Wieërts kalle mer nog neet vör de volle 100%. Ouch ‘t optraeje dao van Fiorenza zal ich noeëts vergaete. Os pap haaj vör miene preensessebegeleider Roy en jeugdbegeleider Robert ‘n shirtje geregeldj van Fiorenza. Umdet di-j twieë d’r vôl van haaje genote beej mien uutroping en zelfs toen op de buhn mét di-j vröllie hebbe staon dânse.
Vae zeen same mét Preens Wesley 1, de groeëte Raod en de jeugd same nao de Preensereceptie van V.V. de Bokkeri-jjers, V.V. de Spoeëkejaegers, V.V. de Rogstaekers en V.V. de Brökwagters gewaesj. Preens Wesley en ich haaje ouch oeës eîge Preense-/ en Preensessereceptie in ‘t Buurthoês. ’t Woor ‘ne lange mer waal ónvergaetelike daâg. Ich kreeg zelfs ‘n optraeje aangebooje vanne Huppelpupkes woeë det ich zelf drej jaor mét mej heb gedânsj… Vröllie bedânktj! ’s Aoves wi-j det vae thoês wore heb ich al di-j cadeau’s uutgepaktj en uutgestaldj. Ouch dae snuîk en jao, ich heb ‘t gewoge. Ich zal uch neet zégge wi-j völ ’t woor, mer ich weît waal det ich mien tang aafgeloupe jaor good heb mótte poetse.
Dae wage zoog d’r sjiek uut en dae bloonk flînk inne zón.
Vuuër d’n optocht kwoom edereîn nao os haer. Vae stónge op ‘ne nowwe Jeugdwage dae de vri-jwilligers vanne Vêrkusköp dit jaor haaje gebawdj. Dae wage zoog d’r sjiek uut en dae bloonk flînk inne zón. Waat sjiek um al di-j minse langs de kânt te zeen staon tiêdes d’n optocht en zelfs Jeugdpreens Stan mét hieël de Jeugd vanne Rogstaekers woor kaome kieke.
Ouch mét de baggemiddig hebbe vae nog flînk gefieëstj tot ich mien foto mós ophânge beej de rest van de Aod-Preense en Preensesse. Toen mós ich toch waal ‘n paar traone laote mét Faye en Lotte. Deensdigs zeen vae nog nao d’n optocht beej de Brökwagters gewaesj um vervolges nao ’t Keenterhart te gaon vör de abdicatie. Ieërst de Jeugdraod en daonao vae as drejtal. Ich mocht toen nog eîne kieër de minse towspraeke mét ‘ne bedânkspeech. Daonao woorte vae óntdaon van os attribute. Ieërst Faye en Lotte heur mântels, staekskes en heur adjudântemedalie. Daonao ich….zoeë mós ich de scepter, de mântel, mien kruuënke en mien preensessemedalie inlevere. Efkes later kwome vae trök as Veerle Stijnen, Faye Hansen en Lotte Passage.
Minse waat heb ich genote van dieës waeke en ‘t hieël Vastelaovendjssezoên 2019. En dan sloêt ich nog eîne kieër aaf oonger miên devies: Dit jaor neet huppele of tieëge ‘ne bâl aan hawwe mer mét uch ‘n fieëstje bawwe!!
Minse bedânktj!!! Aod-Jeugdpreenses Veerle 1