Uit de Gazet: Nog ein woeërt van Aod Preens Wesley I

Op 9 september leep ich op ‘n fieëst John Koppen tieëge ‘t liêf. Hae vroog of ich de aankaomendje waek ’nen aovendj thoês woor, want ze wore bieëzig um ‘n book mét anekdotes te make oeëver diverse aod-Preense en aangezeen miene pap Hennie Preens és gewaesj in 1995 vroge ze of ich wat anekdotes kos vertélle.

Lânksaam begos d’r ‘n lêmpke te börre..
Ich haaj neteurlik nog niks doeër en vae sproke aaf det John same mét Leon Truijen op woonsdigaovendj 12 september zooje aankome. Leon kwoom oppe proppe mét ‘ne vraogeliêst in ’n envelop. Lânksaam begos d’r ‘n lêmpke te börre. Oppe vraogeliêst stóng: Preens Wesley I 2019, wildjae de nowwe Preens vanne Vêrkusköp waere? ’t Ennigste antwoeërd waat vae koste gaeve woor JAO!! Miene groeëte droûm dae ich haaj sinds 1995 zooj gaon uutkaome. Ich woor neteurlik herstikke gruuëts en bli-j. De eventuele adjudânte kwome al geliêk ter spraoke.

..haaje vae eîgelik ânger dinger aan oeëze kop.
De 1ste adjudânte stóng geliêk vast en woort ouch geliêk gebeldj. Det woor mien zösterke Joëlle. Noow woor ’t zoeë wiêt, de 1ste vrawwelike adjudânt inne historie vanne Vêrkusköp! ‘n Paar daag daonao woorte ouch de ânger 3 adjudânte gebeldj en ze zagte gelökkig allemaol JAO; det wore mien kammeräöj Roy Hermans, Bart Salmans en Jeroen Janssen. Heejnao begoste geliêk de vuuërbereî-jinge, hoêswêrk dus. Aangezeen Bonnie en ich op 28 september gónge trawwe, haaje vae eîgelik ânger dinger aan oeëze kop. D’r mós van alles vuuërberédj waere. ’T Woor gewêldjig um dit te doon en regelmatig mét z’n alle beejeîn te kaome. De tiêd vloog verbeej.

Det woor ’n gewêldjig geveul!
Op d’n aovendj vanne uutroping woor ich zelf neet echt zieënewechtig en ich haaj de oeëpeningsspeech good in miene kop gestâmptj. De oeëpeningsact woor perfect uutgeveurdj doeër de adjudânte en mét völ bombarie en spektakel woort ich uutgerope doeër Vorst Dennis. Det woor ’n gewêldjig geveul! Ouch sjiek woor det miene pap inne zaal stóng en van niks wis, dus kómplieët woort verrasj.
Nao de installatie moch ich eindelik mienen
oeëpeningsspeech doon. Dae góng perfekt en op ’t indj woorte mien vraw, wichter en adjudânte mét aanhâng nao vuuëre gehaaldj en geïnstallieërdj.
D’r mós nog eîn dînk gebuuëre: de scepter. Dieëze kieër goof de vuuërzitter vanne aodPreenseklub de ieër aan miene pap um 24 jaor nao zien eige Preensetiêd zienen opvolger en zoeën de scepter te oeëverhendjige, dit woor ’n schoeën memênt.

..zienen opvolger en zoeën de scepter te oeëverhendjige..
Vanaaf toen gónge vae in volle vaart van weekend nao weekend. ’t Woor begónne en vae genote mét volle teuge. Vae hebbe os oeëverâl laote kieke as groep en as vereîniging. Vae zeen d’r oeëverâl vôl vör gegânge. Ich genoot vanne speeches di-j ich oeëverâl mocht gaeve. De schoeënste activiteite wore vör mich: ’t Boôrebâl beej ’t Kraenke; oppe Buhn same mét gewêldjige artieste zoeë as Mark Gruythuijsen (60.000 maeter), Nick van Ham (vleegmesjien) en Moeërepetazie (Jaqueline). En mer mej blaere aanne microfoon. Kuit op Zuid woor neteurlik ouch fantastisch in ’n aafgelaaje vôl buurthoês.
De Preensereceptie van Veerle en mich woor óngehuuërdj, zoeë völ minse. De jubileumreceptie vanne Straotvêrkus beej de Soos woor ’nen aovendj vör inne beuk. Uteraard woor d’n optocht ‘t hoeëgtepûnt van ’t vastelaovendjweekend; schoeën um allemaol bekindje naeve de kânt persuuënlik aan te spraeke en te bedânke. As Preens vanne Vêrkusköp kujje dan (bekans) alles make en zégke, gewêldjig!
Helaas kwoom aan dieëze schoeëne tiêd ouch ’n indj. ‘t Woor tiêd um same mét mien gezin métte lift te verdwiêne. Waat heb ich same mét mien vraw Bonnie en oeës wichter genote van dieëze ónvergaetelike tiêd. Vae wille V.V. de Vêrkusköp bedânke det vae dieës kâns gekrege hebbe.

Edereîn bedânktj, bedânktj, bedânktj!!! Heej op Zuid gieët ‘t gebuuëre, det zulle ze in hieël Wieërt huuëre!!!!

Aod-Preens Wesley 1