Uit Ons Archief // Gazet 2015-2016: De Horeca tieëdus de vastelaovundj in BuurthoeësMoesel
In 2001 kwoom V.V. de Vêrkusköp beej mich, Ton Aspers, met de vraog um ut behieër van ut horeca gedeildje te doon tieëdus de vastelaovundj innut Buurthoeës.
Umdet in det jaor de Vêrkusköp de horeca in eige behieër ging doon en umdet ich al 17 jaor de horeca reegeldje op Bospop, heb ich det op mich genoeëme um alles in gooj baane te lei-je en met gooj vrijwilligers ging det prima. Mer um alle aktiviteite in gooj baane lei-je waasj ein zwaor taak um det allein te doon en daorum woort dur versterriking gezochtj. Nao waat róontvraoge woorte dur 2 kandidaate gevônge en de Vêrkusköp waare dur me-j akkoeërt um Henk Meulen en Pierre Emans aan te stelle. En zoeë geenge vae as team met zun drei-jje aanne slaag. Henk en Pierre vör de bars enne zaal, Ton vör alles waat dur oppe achtergroond mòs gebuuëre, zoeë-wi-j lieëste maake, kuuëkebemanning, oeëpening en sloeëte vanne zaal ennut poetswerrik nao aafloup. Vae krieëge al snel de naam: de 3 Musketiers in ut Roeët.
En neet te vergaete oeës daames Rietje, Lizette en Marianne. Dânkze-j eur kòste de manne dur altieëd zeen. Ouch zeuj stooke de hâng oet de mouwe. Lizette en Rietje beej de bar en Marianne koeëke vör ut personieël.
Doeër de jaore haer hebbe vae völ hullep gehadj van vrijwilligers di-j de vereiniging ein wêrm hert towdrooge. Ouch achter de scherreme woort dur haart me-jgewerriktj doeër de Aod-Preense, Aod-Adjedânte en Convent. Doeër umstandigheede en zîkdje es dur eine 4e Musketier beejgekoome inne persoeën van Henny Moonen.
Met ut juubieleejum zeen vae innut now gestoeëke: ein schoeën zwert heume met ein roeët hesje. Ouch ut persoenieël haaj schoeën pooloos, dus vae staon dur schoeën en good herkinbaar op. Opput îndj vannut sezoeën loupe vae allemaol met de tong oppe groond, mer as de 11djevanne11dje wieër in zicht keumptj, kriebeltj ut wieër. Neteurlik hoeëpe vae det de vastelaovundj ouch dit jaor wieër slaagtj.
Vae weense Jeugdpreens……. en Groeëte Preens……völ suukses. Raot, daamus en Waerse Kuj, zoeëwi-j de Vorst altieëd zieët: ut gieët uch good.
‘Ne schoeëne vastelaovundj naames de 4 Musketiers
