Uit Ons Archief // Gazet 2015-2016: Effe vuuërstelle: Ruud Meulen
Ich bin Ruud Meulen, 28 jaor joonk en geboeëre as schaop opput Groenewoud. Mer vanaaf kleins aaf huppel ich al roond achter de Tunnels op Wieërt-Zuid.
Vastelaovundj es mich met de paplieëpel ingegaeve en de Boonte Aovundj vóng ich as klein menke hieëlemaol geweldjig. In mieën jongere jaore heb ich nog mooge geneete vanne groeëte coriefeeje di-j dieëze Boonte Aovundj hebbe gehadj ( Huub Stroeks, Martje de Bèls, An van Tungelder) en neteurlik neet te vergaete Ellen, Annie en Paula, di-j mich as rookie in mieën ieërste paar jaor de kneepkes vannut vak gelieërdj hebbe.
Wi-j esj allemaol begosj:
Now 5 jaor gelieëje, nao jaore nao de Boonte Aovundj gekieëke te hebbe dacht ich: det wil ich ouch. Ich heb toen ‘ne meel gesteurdj nao regisseur Bèr Raemaekers met de vraog of ich neet eins auditie kòs doon en op gesprek kòs koome. Dit, umdet ut mich geweldjig schoeën leek um ouch oppe plênk te staon. Nao ein tiedje niks gehuuërdj te hebbe, kwoom dao antwoeërt en ich mocht eins langs koome. En zoeë es ut bèlke gaon rolle.
Mieën 1e rol woor di-j van chineese koeërtdânseres. Neet völ tekst, mèr wul stikke vanne zieënewe. Vuuër de gurdien me-j as 1e stûk, mer gelökkig stónge dur achter beej de griem ein deil artieste klaor um mich op te vânge. Det woor geweldjig. Mer zoeë gieëtje eeder jaor. Vuuër eur 1e sketsj hae-je zieënewe, mer as ut stûk aane gang es…dan vèltj alles zoeë van uch aaf.
Wi-j gieëtj now:
Nao 5 jaor spuuële kruuptj dur al ein bîtje roetine in, mer toch zeedje noeëts oetgelieërdj. Vuuëral azzje eeder waek moogtj oefene met de draagendje krachte vanne huidige Boonte Auvundj ( John Koppen, Wil van Ratingen, Petra Raemaekers en Mario Zasada). Eedere rippetiesie lieërdje nog ‘ne houp beej. Vuuërig jaor, wi-j ich ein döbbelrol haaj as Landhieër vanne Schäöpkes en Boonte Aovundj spuuëler, waasj lastig…ich wisj al effe en ouch Adjedânt en buuttekeuning Charlie wisj, mer de rest zoog ut pas oppe oetrooping, 2 waeke vuuër de Boonte Aovundj. Mer ich woor vuuërberrechtj dieës 2 ròlle te mooge kombinieëre. Ich kin alle deilneimers aanne wichtermiddigzegke, gaotj dur me-j doeër, want kiektj mer nao de boonte vêrkus as eur vuuërbieëldj..de jeugd heef de tòwkomst…ouch beej os op Wieërt-Zuid.
