Uit Ons Archief // Gazet 2015-2016: VV de Straotvêrkus
Straotvêrkus…As dae-jae det opzeuktj innut Wiëerter woeërdebook dan stieët dao: Straatjeugd- of- iemand die veel op straat vertoeft. ‘Ne passendje naam vör dit stel snoeëter-köp, refererendj nao de vereiniging van Zuid.
Doeër de tieëd hebbe zich waat naame bedânktj en zeen dur ouch mân beejgekoome. Ein klup van zes mân blieftj oeëver. Zoeëwaal binne as boete ut vastelaovundjsezoeën haoje vae os ôngereîn. De kroeg in, op vurkansie, impulsieve iedeeje en plenninge di-j noeëts loupe wi-j bedoeldj. Boete oeës vrindinne deile vae eigelik alles, tot wc-selfies aan tôw.
Aankoomendj jaor stieët dur zat oppe plenning. Vae zeen in saamewerking met ânger bieëzig um ein vastelaovundjaktiviteit op te zette inne stad, vae wille ‘ne waage bâwwe vör op Zuid, eine vör inne stad, oeëze BBC-Preens mot nog ontgreuntj waere en stiekum zeen vae al bieëzig vör ein knallendj 1×11 fieëst in 2018.
En det alles terwiel vae ein vêrreke op oetzending hebbe en eine op boetelandse staazje in Qatar. Gelökkig hebbe vae eeder jaor stuuën van de 3 J’s. Nein, neet di-j vanne tillevies! Mèr van Jan Salmans, Jan Gabriëls en Jan Wullems. Met kreatieve en finansjeele ôngerstuuëning zörrige dieës men, en achter eedere mîns stieët nog ein sterkere vraw, dur vör, det vae eeder jaor tot ein suukses kinne breenge. Opput mement van laeze zeen vae al tieëde aan ut steggele ôngereîn…
Det kriegdje as zoeëvöl men in ein kreatief proces zitte woeë-in eederein mèntj dettu ut baeter wèdj. Ein ekskuus um ônger alle verplichtinge oet te koome di-j ut opgruj-je met zich mètbringtj. Zaoterdigs kaoj lij-je inne loeëds oppe Boshoeëverbieëk, beer en frikadelle aete, mer lekker met de men ôngereîn. Met Stef en Daan vuuërop aan ut mottobord zulle vae dit jaor wieër prebieëre um uch net zoeëvöl plezeer te laote belaeve as det vae dur zelluf in hebbe. Laotj gerösj eur blieëk van waardieëring blieëke doeër os te vurzeen van beer en frikadelle as det vae langsloupe. Ânges zeen vae mekaar op Kuit op Zuid!
